Í dag, 12.október, fagnaði Þóra okkar 83ja ára afmæli sínu. Hún bað um brauðtertu í tilefni dagsins og fékk hana auðvitað. Hún var glöð með daginn. Síðar um daginn var farið í keilukeppni við góðar undirtektir.

Við gerðum okkur glaðan dag og héldum október fest. Margir klæddu sig upp og aðrir fengu gleraugu til að skreyta sig með. Maturinn var að sjálfsögðu hafður í stíl og var boðið upp á snitsel og tilheyrandi í hádegismat og „pretzel“ eða saltkringlur með kaffinu. Þessi þemadagur vakti mikla lukku hjá okkur.

Í dag, 6.október á Birgir okkar afmæli og hvorki meira né minna en 75 ára afmæli. Því var fagnað með honum og var hann hinn kátasti með daginn. Ekki skemmdi fyrir að einnig var gripið í Boccia leik. Við óskum Birgi innilega til hamingju með daginn sinn.

Grétar Pálsson var búinn að vera búsettur hjá okkur á Fellsenda síðan nóvember 2006. Hann lést í mars 2023 og arfleiddi Hjúkrunarheimilið Fellsenda af öllum sínum eignum. Í dag, 24.september, fengum við síðan afhenta hjólastólalyftuna sem keypt var fyrir arfinn frá Grétari. Við erum ákaflega þakklát fyrir að hann hafi hugsað svona hlýtt til okkar  

Það er alveg bráðnauðsynlegt að nýta alla góðviðris dagana sem við fáum og skruppu nokkrir í göngutúr. Að sjálfsögðu smellum við mynd af dugnaðarforkunum 😉

Það er alltaf stutt í grín og glens hjá honum Gísla og þegar hann frétti af nýjum hárnetunum sem eldhúsið var að taka í notkun þá vildi hann ólmur prófa 😉 Hann tók sig bara vel út.

Vinsælt hefur verið upp á síðkastið að fara í keilu og boccia og fjölgar þátttakendum jafnt og þétt 🙂

Frábær þjónusta hjá henni Völu, í versluninni Hjarta mitt, því hún kom með fullt af vörum til okkar á Fellsenda og gátu íbúar og starfsfólk verslað. Þetta vakti mikla lukku, sérstaklega hjá íbúunum sem eiga ekki eins auðvelt með að „skreppa“ í búðir. Við þökkum Völu kærlega fyrir komuna til okkar <3  

Í dag, 2. september á Rut afmæli og er hún 77 ára. Hún bað um hjónabandssælu með kaffinu og var hæstánægð með kökuna. Við óskum Rut innilega til hamingju með daginn sinn 🙂

Stólaleikfimi er komin aftur á dagskrá eftir langt hlé. Stjórn leikfiminnar er í höndum Ingu sem hefur mikinn áhuga á að virkja aðra íbúa í kringum sig. Inga fær stórt hrós skilið fyrir dugnað og flott framtak.